Ginpatpat ni Central Negros Electric Cooperative Board of Directors member Eugenio Velasco ang mga tikang nga ginhimo ni Power Watch Negros convenor Wennie Sancho sa pag-akusar sang management kag board sang CENECO kag ginpahayag nga ini ang wala sang probable cause.
Sa press conference nga ginpatigayon sa opisina sang CENECO kahapon, ginpahayag ni Velasco nga sang opisyal ini nga nagpungko bilang board sa CENECO sang Mayo 25, gin-akusaran gilayon sang connivance ang board kasubong man sang illegal contracting kag overpricing paagi sa pahayag ni Sancho sa radyo.
Suno diri, nagfile man sa National Electrification Administration sang mga charges tuhoy sa overpricing, korapsyon, incompetence kag gross neglect of duty ang Power Watch kag wala pa ini nakontento, padayon sa gihapon nga nagapang-atake sa media.
Suno sa iya, wala ginhulat sanday Sancho ang desisyon sang NEA kag ginpacongressional inquiry gilayon ang ila mga alegasyon nga wala man ma-establish.
Gindismiss sang NEA ang lima ka mga charges bangud wala ini sang factual nga basehan kag bangud sa kakulang sang probable cause gani nagsumbit ang Power Watch sang position paper kay Councilor Kalaw Puentevella.
Suno sa iya, wala man sila nalakip sa mga gin-imbitahan nga magtambong sa session apang nakabati lamang ini sa radyo nga sila pa ang malain bangud wala sila nakigbahin.
Suno pa diri, nagsulat man si Sancho sa Office of the Presidente, sa secretary sang Department of Energy kag kay Senator Raffy Tulfo nga amu ang committee chair sang Energy sa Senado.
Suno kay Velasco, apat na ka venue ang iya ginpasahan kag basi sa masunod, malab-ot pa ini sa United Nations, kay US President Joe Biden kag Russian President Vladimir Putin.
Suno sa iya, wala sang probable cause ang mga ginabato sa ila nga mga akusasyon.
Gintawag naman ni Power Watch convenor Wennie Sancho nga out of order ang ginahimo ni Velasco kag nagpanindugan nga indi siya ang nagpalapta sang sulat sa Presidente.
Suno kay Sancho nga tapos na ang kaso kag ginasulit pa ini ni Velasco.
Gin-athag man sini nga indi ini ang nagpadala sang sulat kay President Ferdinand Marcos Jr.
