Gin-athag sang manager sang Engineering Department sang Central Negros Electric Cooperative, Inc. (CENECO) nga wala sang pagpangsabotahe nga natabo matapos nagbrown-out antes magpatigayon sang speech si Mayor Alfredo Benitez tuhoy sa iya accomplishment sa first 100 days sini sa opisina sang Sabado.
Suno kay Engr. Jose Taniongon, mga alas 6:00 sang gab-i sang Sabado, may power interruption nga nagluntad sa Bacolod Government Center nga nagdugay sang kapin apat ka minutos.
Suno kay Taniongon, may yara sang apat ka feeders nga ginalakipan sang Burgos Feeder 1 nga ang linya ang padulong sa New Government Center; Burgos Feeder 2 nga sakop ang Greensvile kag Homesite; Burgos Feeder 3 nga sakop ang Granada kag Alangilan; kag Burgos Feeder 4 nga sakop ang Estefenia.
Sang Sabado suno diri, sang nagkapower interruption sa NGC, nagpadulong ini gilayon sa substation kag nakit-an nga nag-activate ang ila recloser bangud may disturbance sa linya.
Isa sa mga disturbance sa linya amo ang kun kaisa may nagasaka nga tuko, nga suno dira apisar nga wala ginapatihan sang kadam-an, matuod-tuod.
Suno diri, masobra 2,000 amperes nga concurrent ang napick up sang recloser gani nagtrip ang Burgos Feeder 1 agud malikawan ang dugang nga damages.
Suno sa iya, kun indi magtrip, posible nga bilog nga substation nga wala man kuntani sang problema ang maapektuhan.
Suno kay Taniongon, isolated ang ini nga kaso kag wala sang pagpangsabotahe.
Nagpasalig man ini nga wala untat ang ila pagmintinar sang mga linya agud maimprove ang reliability sang electric cooperative.
