Ginpangunahan ni President Ferdinand “Bongbong” Marcos Jr. ang ceremonial energization sang Cebu-Negros-Panay 230 kilovolts backbone project sang National Grid Corporation of the Philippines (NGCP) sa ciudad sang Bacolod.
Paathag sang Presidente nga ang aktibidad ang nagapakita sang commitment sa pag-empower sang kumunidad kag pagpasanyog sang connectivity.
Ginakilala man sini ang madinalag-on nga pagtapos sang NGCP sa proyekto nga makabig milestone sa patag sang power infrastructure.
Ang submarine cable amo ang magatingob sang mga independent power system nga ginalantaw nga magasolbar sa mga problema sa power supply kaangay sa lapnagon nga power outage sang tinalikdan.
Dugang pa sini nga sa pagdamo sang populasyon, nagasanyog man ang ekonomiya, gani dapat kaupod sini nga magasanyog ang power supply.
Panindugan ni Presidente Marcos nga isa sa nagabalabag sa pag-uswag sang ekonomiya amo ang kakulang sa power supply.
Suno pa diri, ang CNP Project ang indi lamang magabenipisyo sa Cebu-Negros-Panay kundi sa ekonomiya sang bilog nga pungsod.
Pasalig sini nga ang gobyerno sang Pilipinas ang nagatrabaho upod sa Department of Energy (DOE) kag NGCP agud masolusyunan ang mga problema sa kuryente, kag ginatinguhaan nga mapadasig ang proseso agud ini ang mapatuman na kag ma-enjoy sang mga konsumedor.
Panawagan man sini sa mga stakeholder kag investors nga suportahan ang mga proyekto, partikular na sa Cebu-Negros-Panay subgrids agud maseguro ang self sufficiency.
Ang pagbukas sang balor P67.98 billion CNP project ang pamatuod na nga sa pagbuligay sang mga ahensya, malab-ot ang energy agenda sang pungsod.
Target ni Marcos nga malab-ot ang mas maayo kag mas masanag nga bwas damlag para sa tanan nga Pilipino.
