BACOLOD CITY — Kadungan sang paglaslas ni Bagyo Basyang sa probinsya sang Negros Occidental, ginlampaso man sang Ceres Negros Football Club ang Cambodian team sa ila nga pag-atubangay sa AFC Cup 2018 sa Panaad Park and Stadium kagab-i.
Apisar sang pagbunok sang ulan wala nagpapugong ang 2,638 ka mga tumalan-aw agud saksihan ang pagkamasa sang Ceres-Negros FC sa Boeung Ket FC sa score nga 9-0.
Una nga nakapasulod para sa Negros-based football club si Takumi Eusato sa ika-14 minutos sang first half kag napasulod naman ni Jose Elmer Porteria ang ika-lima kag ulihi nga goal sang 1st half.
Sa pagsugod sang second half naangkun sang Ceres ang ila ika-anom nga puntos pinaagi sa “own goal” matapos nga napasulod ni Sun Sovannrithy sang Cambodia sa ila nga side ang bola.
Natapos ang 90 minute duration sang hampang sa ika-siyam nga puntos sang Negrense team nga ginhatag liwat niPorteria.
Wala naman ginalauman ni Ceres head coach Risto Vidakovic nga mangin mahapos ang hampang sang iya team bangud man sang malain nga panahon bangud nga napaidalom sa signal number 1 ang Negros Occidental lakip na ang Bacolod City kagab-i.
Sunod nga atubangon sang Ceres Negros ang Home United FC sa Singapore sa Pebrero 23.
