Nagapanawagan ang labor advocate sa gobyerno nga hatagan sang intervention ang ginapangtubang nga problema sang mga empleyado sang Bacolod Modernized Jeepney Transport Association, Inc.
Ini matapos makabatun sang foreclosure order kag demand letter ang Bacolod Modernized Jeepney Transport Association, Inc. gikan sa bangko matapos wala makabayad sa utang.
Sa interview sang Bombo Radyo kay Wennie Sancho, Secretary General, General Alliance of Workers Association (GAWA), ginpahayag sini nga isa ka dako nga pagtilaw sa mga empleyado sang modernized jeep ilabi na sa ila nga pamilya kun madayun man gid nga butungon ang ila salakyan nga gin-utang sang kooperatiba sa bangko.
Gani panawagan sini nga dapat may yara sang intervention bangud suno diri, ang gobyerno man ang nagpatuman sang Public Transport Modernization Program (PTMP).
Ini agud mabuligan ang mga ang kooperatiba kag mahatagan sang sistema nga amat-amat makabayad sa utang agud mapadayun ang ila pangalabuhian.
Pahayag ni Sancho, ginpamatukan nila sadto ang amo nga programa apang wala na sila sang may nahimo pa bangud ini ang gin-implementar na sang gobyerno.
Gani suno diri, indi na dapat magbasulay pa kundi buligan nalang sang gobyerno ang kooperatiba kaangay sa paghatag sang temporary aid.
Bangud kun indi ini masolusyuanan, suno kay Sancho, maapektuhan man ang tanan ilabi na ang mga commuters.
Dugang pa sini, dapat ang Konseho sang ciudad ang magpasa sang resolution agud maka-intervene sa dako nga problema nga ginaatubang subong sang PUV.
Nahibaluan nga yara sa P1.5 million kag P2.6 million ang balor sang tagsa ka modernized public utility jeepney.
