BACOLOD CITY — Nangin saksi ang masobra apat ka libo nga mga football fans sa paglutos sang Ceres Negros Football Club sa Shan United sa ila nga pag-atubangay sa nagapadayon nga Asian Football Confederation (AFC) Cup 2018.
Nagmadinalag-on ang Ceres Negros FC sa score nga 2-0 sa hampang nga ginhiwat sa Panaad Park and Stadium sa ciudad sang Bacolod kagab-i.
Nangin maiwat ang score sa first half sang match kun sa diin natapos ini nga wala naka-iskor ang duha ka team.
Apang kadungan sang pagtupa sang talithi sa second half naka-goal na si Patrick Reichelt sa 78th minute para sa Negros-based football club kag ginsundan naman ni Bienvenido Marañon sa ika-82 nga minutos sang match.
Natapos ang hampang nga wala naka-skor ang pangayaw nga team gikan sa Myanmar sa atubangan sang 4,294 nga nangin saksi sa hampang.
Bangud sini, nagapanguna karun sa Group F sang AFC Cup 2018 ang Ceres Negros kun sa diin upod sini diri ang Shan United, Home Home United FC sang Singapore kag Beoung Ket FC sang Cambodia.
Matapos ang hampang ginpahayag ni Soe Myat Min, coach sang Shan United nga “well-deserved” sang Ceres ang ila kadalag-an kag madamo sang sila sang natun-an nga leksyon sa ila nga kalutusan.
Samtang sa bahin naman ni Marañon, aminado ini nga madamo siya sang na-miss nga tsansa nga maka-goal kag nagpasalamat na lang ini nga naka-isa siya.
