Ginabanta 700 tubtob 800 ka mga drivers kag operators sa ciudad sang Bacolod ang nagpartisipar sa ginpatigayon nga transport strike kag rally protest sa idalom sang Bata flyover kaina sang aga.
Nagtipon ang mga drivers kag operators sang Bacolod Alliance of Commuters, Operators, and Drivers (BACOD-Manibela), United Negros Drivers and Operators Center (UNDOC), kag Pagkakaisa ng mga Samahan ng Tsuper at Opereytor Nationwide (PISTON), kasubong man ang mga drivers sang taxi kag tricycle para magpatigayon sang transport strike kag rally protest.
Sa interview sang Bombo Radyo kay Rudy Catedral, presidente sang BACOD-Manibela, wala sila nagapangayo sang saka sa pletehan apang ginapanawagan nila nga dulaon na ang fuel excise tax, value added tax kag ang oil deregulation law.
Suno diri, ginapanawagan nila ang patas nga paghatag sang ayuda kag ini deretso nga ihatag sa mga drivers.
Suno kay Catedral, tuman ka strikto ang ginapangayo nga requirements sa ayuda kag halos masobra 100 ka mga drivers kag operators ang wala nadala sa lista kalakip na siya.
Pahayag sini, wala sila nagapanukot sang dugang sa plete bisan nga dako ang ila magasto sa pagpatughong, apang sila pa ang indi makabaton sang ayuda.
