BACOLOD CITY — Igahatag sang Ceres Negros Football Club ang 200 percent sang ila masarangan agud lutuson ang FC Meralco Manila sa ila pag-atubangay sa nagapadayon nga Philippine Football League (PFL) 2017 sa Panaad Park and Stadium, alas 4:00 karon sa hapon.
Sa ginpatigayon nga press conference kahapon, ginpahayag sang goalkeeper sang Negros-based football team nga si Louie Michael Casas nga doble ang igahatag nila sa sini nga hampang sa paglaum nga ila malutos ang Meralco Manila nga number one sa ranking sa karon.
Suno kay Casas, indi lamang nila luyag nga malipay ang bug-os nga team kundi luyag man nila mahatag sa ila mga kasimanwa ang isa ka maayo nga hampang.
Samtang, aminado naman ang FC Meralco Manila nga uyat sang Ceres Negros FC ang homecourt advantage kag indi man lahug-lahog nga team ang ila maatubang sa football field.
Suno kay Coach Jeffrey Liman, nagpatigayon man sila sang nagakaigo nga adjustments matapos nga indi makaupod sa hampang ang mag-utod nga Phil kag James Younghusband nga pambato kuntani sang team.
Suno kay Liman, may ginbulos na sila nga mga players bilang tal-os sa mga Younghusband apang magluwas sina, wala na sila sang iban nga ginbag-o sa ila nga depensa.
