Pagpatuman ang luyag nga makit-an sang chairman sa Committee on Energy sa Sangguniang Panlungsod sang Bacolod kasunod sang mga plano nga ginplastar sang National Grid Corporation of the Philippines (NGCP) para sa 2025 tubtob 2030 sa ginpatigayon nga Consultative Power Summit kahapon.
Ang Energy Summit ang ginhost sang Negros Occidental provincial government kun sa gin-imbetar man ang mga opisyal sa ciudad sang Bacolod partikular na sa Bacolod City Mayor Alfredo “Albee” Benitez, kag yara man ang mga representante gikan sa NGCP, Department of Energy, National Electrification Administration, Distribution utilities kasubong man ang mga stakeholders.
Sa interview sang Bombo Radyo Bacolod kay Bacolod City Councilor Claudio Jesus “Kalaw” Puentevella, ang mayor nga mga gindiskusyunan amo ang mga natalana nga kuhaan sang dugang nga power supply para sa probinsya kasubong man ang iban pa nga mga concerns sa grid.
Ginpasalig sang NGCP nga sila ang may kuhaan nga linyada gikan sa Dumaguete kasubong man dugang nga power supply gikan sa Cebu.
Ginapakamaayo sini nga yara mismo ang mga opisyal sang DOE, kag nabatian ang mga ginbuy-an nga pasalig sang NGCP.
Paathag sini nga ang Bacolod City ang sentro nga apektado sa kakulangan sang power supply ilabi na nga halos tunga sa power consumption sa Negros Occidental ang yara sa ciudad.
Suno kay Puentevella, wala pa ini sang kaseguruhan kun matuman gid man ang mga ginpahayag nga plano, bangod aminado ini nga madamo sang mga nagaligad nga plano ang NGCP nga wala man natuman.
Paathag sang konsehal nga ang Bacolod City kag probinsya sang Negros Occidental ang wala naga-ayo kundi nagademand sang nagakaigo nga supply sang kuryente.
Ang NGCP ang nagplastar sang 2025-2030 plan, apang pahanumdom sini nga immediate solution ang ginakinahanglan sa karun.
Panawagan naman sang konsehal sa Central Negros Electric Cooperative Inc. (CENECO) nga kun mahimo indi anay magpatigayon sang preventive maintenance karun nga tuman ang init.
