Nagahanda na ang Carlos Hilado Memorial State College (CHMSC) sang transition padulong sa unibersidad matapos nga nangin layi na ang hagna nga magaconvert sa ila bilang state university.
Nahibaluan nga mismo ang author sang hagna nga si Bacolod City Lone District Congressman Greg Gasataya ang nagkumpirmar nga ginpirmahan na ni Presidente Rodrigo Duterte ang amo nga hagna sang tinalikdan nga adlaw.
Sa interview sang Bombo Radyo kay CHMSC President Dr. Renato Sorolla, tuman ang pasalamat sini kay Gasataya kag sa iban nga mga mamalidha nga nagsuporta sa hagna, kalakip na kay Presidente Duterte nga nag-aprubar sa bill.
Natapos na suno kay Sorolla ang Roadmap 1 nga ginhanda sang CHMSC bilang isa ka state college kag nagtuon naman sa paghanda nila sang Roadmap 2 ang pagpirma sang layi.
Ang Roadmap 2 ang strategic plan sang CHMSC sa masunod nga lima ka tuig.
Nagalaom naman ini nga macomply gilayon sang CHMSC ang tanan nga requirements sang accrediting agency agud maka-function na sila bilang state university.
Kada tuig suno kay Sorolla, indi magnubo sa 10, 000 ang populasyon sang CHMSC sa Talisay, Bacolod kag Binalbagan bangud gina-maximize ang absorptive capacity sang kolehiyo.
Sa tion nga mangin state university na ang CHMSC, mas magasangkad na ang matanyag sini bangud magluwas sa instruction programs, may yara naman ini sang research programs nga maga-introduce sang bag-o nga kaalam.
