May mga aktibidad na nga ginapatigayon ang Philippine Red Cross Negros Occidental – Bacolod City Chapter may kaangtanan sa pagsaka sang kaso sang cholera sa probinsya sang Negros Occidental kag syudad sang Bacolod.
Suno kay Chapter Administrator Rita Benita Mirasol, pila na ka semana ang pagpatigayon nila sang mga aktibidad kag ini ang mas ginpasanyog pa kasunod sang pagdeklarar sang cholera outbreak kaangay sa Barangay Alijis, Bacolod City.
Apang paathag sini nga antes paman ang deklarasyon, nakapatigayon na sila sang paghinun-anon sa nagkalain-lain nga barangay nga apektado sa kaso sang cholera sa syudad.
Nakig-angot naman ang Philippine Red Cross sa Bacolod City Health Office (CHO) kasubong man sa nagkalainlain nga mga local government unit (LGU) sa Negros Occidental agud estoryahan ang mangin response sa outbreak sang balatian.
Nagpatigayon man ang mga ini sang community assembly kun sa diin gina-emphasize sini ang panginahanglanon sa nagakaigo nga hand washing, good hygiene kasubong man ang kampanya para sa zero-defacation.
Paathag ni Mirasol nga nakita sang mga ini nga ang sources sang cholera amo ang contaminated nga pagkaon kag tubig.
Natabuan man nga sila ang may ginapatigayon nga proyekto sa Water Sanitation kag Hygiene nga iga-implementar sa Negros Occidental.
Suno kay Mirasol, antes paman magluntad ang cholera outbreak nakadiskusyon na ang mga ini sa Provincial Health Office.
Ginapasalamatan man sang Chapter Administrator ang suporta sang National Headquarters sang Philippine Red Cross sa pagpamuno sang Chairman kag chief executive officer Richard Gordon.
Ginalantaw sang mga ini nga mahimo ma-implementar ang proyekto sa sulod sa tatlo tubtob apat ka bulan kag ini ang magafocus sa cholera cases sa Bacolod Citt kasubong man sa syudad sang Silay, Talisay, Victorias kag sa banwa sang EB Magalona.
Santo sa project component sang proyekto, sila ang maga-organize sang Red Cross 142 sa mga apektado nga Barangay kasubong man magamobilize kag train sang mga chapter-based volunteers.
Ang mga ini ang nagapatigayon sang assessment sa nagkalainlain nga Barangay nga may kaso sang cholera.
Tinutuyo man sini ang matrain ang mga volunteers sa participatory hygiene kag sanitation transformation.
Pinaagi sini, ginapanugyan sa kumunidad nga ma-improbar ang hygiene behavior, mapanubo ang diarrhea kag mapanugyan kun paano mangin epektibo ang pagmanage sa water kag sanitation sa kumunidad.
Paathag ni Mirasol nga ginakuha nila ang commitment sang kumunidad nga makigbahin sa pagtapna sa cholera cases agud matumod ang health problems nga nagaluntad sa kumunidad ilabi na nga sila ang mismo nga apektado.
