Wala sang may nabaton nga sulat ang Office of the City Mayor tuhoy sa reklamo sang mga choreographer sa Barangay 7 batok kay Punong Barangay Hercy Sibug bangud sila ang wala pa mabayaran sang ila talent fee sa nagligad nga street and arena dance competition sa Masskara Festival.
Sa Facebook post ni Jonel Borromeo Peñol, gintag sini ang Bacolod Yuhum Foundation kag si Mayor Alfredo Benitez sa pagpanawagan kag pagreklamo batok kay Punong Barangay Hercy Sibug bangud sa masobra isa ka bulan na nila nga hulat sang ila bayad nagikan sa barangay.
Sa interview sang Bombo Radyo kay Secretary to the Mayor Atty. Joseph Chui, wala sang may nabaton nga sulat ang Office of the City Mayor tuhoy diri kag suno sa iya, ini ang personal nga responsibilidad sang barangay kag depende sa engagement sang punong barangay kag mga opisyales.
Suno diri, ang city government ang naghatag man sang assistance sa mga competing barangays nga nagabalor P200,000 para sa Arena Competition kag P150,000 para sa Electric Masskara sang tinalikdan nga bulan kag obligasyon sang kada barangay nga iliquidate ang ila gingasto.
