BACOLOD CITY – Gina-finalize na sang Commission on Human Rights ang affidavit kag nagakaigo nga mga dokumento tuhoy sa gin-alegar pagsugo sang isa ka maestra sa Rizal Elementary School sa 41 sini ka mga estudyante agud balbalon ang apat nila ka mga classmate kun sa diin isa ang nagreklamo.
Nahibaluan nga nagreklamo sa CHR si Merly Obina, ang tiya sang biktima nga ginhinago lamang sa ngalan nga “Anggi”, nueve anyos kag estudyante sa grade three section eight sang Rizal Elementary School.
Nakuhaan na sang pahayag sang CHR si Obina kag subong man ang bata kag uyat naman sini ang original nga resulta sang medical examination ni Medico Legal Officer Dr. Ely Cong nga nagapakita sang pagkasunog sa labhag sang magtimbang nga guya sang buli kag subong man sang hawak sang biktima.
Suno kay Baldevarona, ang pagkasunog sa balhag ang nagapatimaan sang internal injury sa bata.
Si Anggi ang ilo na sa mga ginikanan kag tiya na lamang sini ang nagaatipan sa iya.
Base sa alegasyon ni Obina, nagpauli nga nagahibi ang iya hinablos nga si Anggi.
Natukiban nga las-8:00 sa aga sadtong Pebrero sais, Lunes nga adlaw, gin-alegar ginsugo sang manunudlo nga si Rowelyn Bolinas ang 41 sini ka mga estudyante nga balbalon si Anggi kag tatlo ka iban pa sini ka classmates nga wala pa nagpariser sa karon.
Wala pa matumod ang matig-a nga bagay nga gingamit sa pagbalbal sa mga biktima.
