BACOLOD CITY — Personal nga nagakahangawa ang pinuno sang Commission on Human Rights sa Negros Occidental sa madangatan sang ahensya sa tion nga madayon ang pag-angkon nila sang 1, 000 pesos nga budget sa tuig 2018.
Sa interview sang Bombo Radyo, ginpahayag ni Romeo Baldevarona nga nagabatyag sang kasubo ang bilog nga CHR sa pungsod Pilipinas kasunod sang tikang sang Kamara.
Masubo suno sa iya bangud nagagwa nga naga-imbestigar lamang ang CHR sa mga ginahimo sang gobyerno kadungan sang anti-drug campaign.
Pag-athag ni Baldevarona, indi sila kontra sa gobyerno kundi ila ginahimo ang mandato sang Komisyon nga giyahan ang estado nga hatagan sang respeto ang tawhanon nga kinamatarong sang mga Pilipino.
Kun hatagan lamang sila sang isa ka libo ka pesos nga pondo suno kay Baldevarona, indi nila mapun-an ang ila obligasyon nga amligan ang human rights.
Kadungan sini, gin-athag sang opisyal nga mandato nila nga imonitor ang ginahimo sang gobyerno kun bala nagasunod ini sa international treaty obligation on human rights.
Suno kay Baldevarona, malapit isa ka bilyon ka pesos ang ginpropose nila nga pondo apang ginslash ini sang DBM kag ginhimo nga nalang nga 464 million pesos.