BACOLOD CITY — Patimaan lamang nga kinahanglan na sang pinuno sang Commission on Human Rights nga magresign sa pwesto bangud sa pag-angkon nila sang 1, 000 pesos nga pondo para sa tuig 2018.
Ini ang personal nga panindugan ni Abang-Lingkod Partylist Representantive Stephen Paduano sa pagboto pabor sa paghatag sang tuman kagamay nga pondo sa amo nga Komisyon.
Nahibaluan nga magluwas kay 3rd District Congressman Albee Benitez, tanan nga mga congressman sa Negros Occidental ang wala nagpamatok sa motion nga isa ka libo ka pesos lamang ang budget sang CHR sa masunod nga tuig.
Sa interview sang Bombo Radyo, ginpahayag ni Paduano nga ang iya boto ang isa ka political statement nga sa ngalan sang delicadeza, dapat nga magpanaog na sa pwesto si Gascon.
Gin-athag sang congressman nga indi siya akig sa CHR sa pangkabilugan kundi ang leadership ni Gascon ang may issue bangud ginalaktan niya sang pulitika ang pagpamuno sa Komisyon.
Pagarespetuhon naman sini ang Senado kun ila nga ibalik ang kantidad nga yara sa proposed budget sang CHR sa aprubahan nila nga version sang General Appropriations Act.
