Maga-umpisa na ang Commission on Human Rights – Negros Island Region sa paglunsyar sang separado nga imbestigasyon sa pagkamatay sang 19 ka mga persona sa ginapahayag engkwentro sa banwa sang Toboso, Negros Occidental sang Domingo, Abril 23.
Sa interview sang Bombo Radyo Bacolod kay Vincent Parra, investigation division chief sang CHR-NIR, wala sang human rights violation sa engkwentro sa tunga sang militar kag rebelde nga New People’s Army.
Apang suno diri, may nagagwa nga mga alegasyon nga mga researchers, journalists, student leaders, kag social workers lamang ang pila sa mga biktima.
Pahayag ni Parra nga kinahanglan nga mavalidate ang kamatuoran sa mga alegasyon ilabi na nga may mga miyembro sang vulnerable sector.
Nahibaluan nga sa 19 nga napatay, apat diri ang mga babayi, kag ini ang kabahin sa obligasyon sang CHR sa idalom sang Magna Carta of Woman.
Kalakip sa ila kuhaan sang impormasyon ang mga stakeholders, Philippine National Police, Philippine Army kun sila ang willing nga magdialogo, mga pumuluyo sa komunidad, agud mahatagan sang kasanagan ang isyu.
Kuhaon man nila ang mga natipon nga datos sa identity sang mga napatay, kag sila ang makig-angot sa pamilya nga mahimo pa makuhaan sang importante nga impormasyon.
Suno kay Parra, sila ang ginahatagan lamang sang 120 ka adlaw agud makahimo sang konklusyon nga isumiter sa CHR Central Office.
Apang ang final resolution ang magagikan na sa CHR Central Office nga mahimo magamit sa rekomendasyon sa pagfile sang administrative ukon criminal cases.
