BACOLOD CITY-Nagpanindugan ang pinuno sang Criminal Investigation and Detection Group (CIDG) – Bacolod City nga ginhimuan lang siya sang scenario sang operator sang isa ka KTV Bar bangud gindakop niya ini.
Madumduman nga nadakpan si Police Major Melvin Madrona sa ginpatigayon nga entrapment operation sang gintingob nga pwersa sang Philippine National Police Integrity Monitoring Enforcement Group (IMEG) Visayas Field Unit, Special Action Force kag Negros Occidental Police Provincial Office (NOPPO) sa gina-alegar extortion sa sulod sang bulangan sa Purok Guanzon, Barangay Mansilingan ciudad sang Bacolod kahapon.
Sa impormasyon nga nakuha sang Bombo Radyo Bacolod, isa ka KTV bar operator ang nagreklamo sang extortion batok kay Madrona.
Nahibaluan nga gina-alegar nagapangayo ang nasambit nga pulis sang P10 mil nga kwarta kag una nga naghatag sang P5 mil ang tagreklamo sadtong Pebrero 20.
Apang, liwat naman nga nagpangayo sang amo nga kantidad ang suspetsado kag diri na ginpatigayon ang entrapment operation batok sa iya.
Samtang, ginapanginwala naman ni Madrona ang mga akosasyon sa iya.
Suno diri, gin-ubrahan lang siya sang scenario bangud gindakop sini ang nasambit nga KTV bar sa illegal sini nga ginaubra.
Suno sa iya, indi man insakto ang pagdakop sa iya sang mga pulis ilabi na nga Police Major na ini.
Sa karun, nakahunong si Madrona sa kustodiya sang Bacolod Police Station 7 antes dal-on sa Camp Crame.
