Ginhingadlan na ni Interior Secretary Jonvic Remulla ang ginapahayag protektor sang illegal cigarette manufacturing sa Bago City kag sang illegal e-sabong operator sa Talisay City.
Suno kay Remulla, ini ang pinuno mismo sang Criminal Investigation and Detection Group (CIDG) – Bacolod nga si Police Major Edgar Tonico.
Madumduman nga nalakip ang 10 ka Chinese nationals sa naaresto sang ginraid ang warehouse sa Brgy Calumangan, Bago City kun sa diin nakita ang mga makinarya kag raw materials sa paghimo sang peke nga sigarilyo.
Ang pasilidad ang nakarehistro bilang rice trader ukon wholesaler.
Ginraid man ang isa ka warehouse sa Brgy Singcang Airport, Bacolod City kun sa diin narecover ang mga raw materials sa paghimo sang peke nga sigarilyo.
Madumduman nga sang gintinguhaan sang Bombo News Team nga makuha ang bahin sang CIDG Bacolod sa raid, sila ang wala nagsabat.
Suno kay Remulla, indi gikan sa CIDG-Bacolod ukon CIDG-Negros Island Region ang mga operatiba nga nagraid, kundi gikan pa sa CIDG-Cebu kag CIDG Headquarter.
Samtang 30 ka persona man ang naaresto gikan sa illegal online sabong ukon e-sabong operation sa Brgy Concepcion, Talisay City.
Ang e-sabong platform ang nagapakita sang mga lingwehe sang Malaysia, Vietnam ukon Thailand agud mapagwa nga ini ang gikan sa abroad, apang sa matuod dira lamang sa Talisay City ginahimo.
Nahibaluan nga si Tonico man ang tag-iya sang cockpit nga ginagamit sa illegal nga operasyon.
Ang illegal e-sabong operation ang gina-angot man sa pugante nga negosyante nga si Atong Ang.
Sa karun si Tonico ang yara na sa kustodya sang CIDG Headquarters.
