Ginpasalig ni Bacolod City Police Office director P/Col. Manuel Placido nga mas mangin istrikto kag dugangan sini ang police visibility ilabi na sa mga lugar nga masami ginaluntaran sang krimen.
Madumduman nga naghilibion ang isa ka babayi nga nagasakay sa depampasahero nga jeep nga may ruta nga Bata-Libertad matapos nga gin-agawan sang bag sang isa ka pasahero sa dalan Lizares sa Barangay 39, Bacolod City.
Ang suspetsado ang nagsakay sa bangga NOHS kag nagpungko malapit sa biktima.
Pag-abot sa bangga nga madulom, nagpapara ini kag sang nagpanaog, ginsabnit niya ang bag kag gilayon nga nakapalagyo ang suspetsado bangud may nagbantay na nga tricycle bilang get away vehicle sini.
Suno kay Placido, dapat mas mangin istrikto, mapisan kag aktibo ang mga pulis.
Mapadugang man ini sang police visibility kag mobile patrol agud malikawan ang snatching incidents kag iban pa nga krimen.
Iremind man sang city director ang bag-o nga station commander sang Police Station 1 nga si P/Major Ramil Sarona nga ipasiguro nga hugot ang ila ginapatuman nga seguridad ilabi na sa mga lugar nga masami ginaluntaran sang insidente.
