Napamatud-an na nga legal ang proseso sa pagbakal sang duta sang Bacolod City Government sa Ledesma Family sa bahin sang Hda Conchita, Brgy Granada matapos nga gindismiss ang civil kag criminal case sa Office of the Ombudsman.
Ang kaso nga ginfile sang radio blocktimer nga si Roger Ledesma sa alegasyon nga overpriced ang pamakal sang 74 hectares nga duta kag may irrigularidad sa transaksyon, ang ginbasura sang Office of the Ombudsman Visayas bangod sa kakulangan sang ebidensya.
Kalakip sa ginpasakaan sang kaso sanday Congressman Alfredo “Albee” Benitez, nga alkalde pa sadto, pila ka konsehal kag private individual.
Sa interview sang Bombo Radyo Bacolod kay Bacolod City Councilor Atty Caesar Distrito, spokesperson ni Congressman Albee, ang desisyon ang nagapakita nga yara sa husto ang proseso kag para sa pumuluyo ang tikang.
Panindugan sang mga ini nga highly political ang pagfile sang kaso bangod ini ang ginpasaka kadungan sa election period sang 2022.
Suno diri, nasabat ang tanan nga alegasyon paagi sa pagpakita sang mga nagakaigo nga dokumento, kag nakita nga mas barato ang pamakal sangsa actual market price, nga suli sa alegasyon nga ini ang overpriced, samtang nasunod man ang tanan nga proseso.
Nagapati ini nga ginfile lamang ang kaso agud mahigkuan ang pangalan sang mga nagakandidato sa eleksyon.
