Kanselado subong nga Miyerkules ang klase humalin sa preschool tubtob sa highschool sa pampubliko kag pribado nga buluthuan sa ciudad sang Bacolod.
Suno kay Joemarie Vargas, cluster head sang City Disaster Risk Reduction and Management Office (CDRRMO) nagdesisyon si Mayor Evelio Leonardia nga kanselahon ang klase sa preschool tubtob highschool bangud sang indi masigurado nga lakat sang panahon apisar wala man sang storm warning signal sa ciudad bangud sang Bagyo Falcon.
Mas ginapakamaayo sang alkalde suno kay Vargas nga mangin luwas ang mga estudyante.
Sa karun padayon man nga nagabantay ang CDRRMO sa palibot sang ciudad agud hawanan ang mga lugar nga natumbahan sang kahoy kag matsekyar ang pagsaka sang tubig bangud sang malain nga paniempo.
Samtang santo sa pinakaulihi nga impormasyon nga nakuha sang Bombo Radyo Bacolod, kanselado naman ang klase sa tanan nga levels, public and private schools sa San Carlos, Sagay, Bago, Moises Padilla kag Binalbagan.
