Nagpatigayon sang closed door meeting kasunod sa natukiban nga pagbaylohanay sang mensahe sang duha ka menor de edad kag nagpahibalo ang isa ka estudyante nga may plano ini magpatigayon sang shooting sa isa ka buluthuan sa Escalante City.
Gin-post ni Jhia Cecilia sa facebook ang litrato sang conversation sang iya hinablos kag ni alyas Jacob.
Sa esturyhanay sang duha, nanugid si Jacob nga magadala ini sang pusil subong nga Lunes para magsulod sa Escalante National High School para magpaniro sa mga estudyante.
Ginpunggan sang hinablos ni Jhia si Jacob sa plano sini apang nagpahayag si Jacob nga wala sang may makapugong sa iya.
Suno kay Jhia, natulogan ang iya hinablos amo nga nahimo sini makuha ang iya tablet kag mabasahan ang messages.
Sa interview sang Bombo Radyo kay PLt Col Florendo Fajardo, hepe sang Escalante City Police Station, may ginpatigayon nga closed door meeting nga ginalakipan sang kapulisan, Department of Social Welfare and Development (DSWD), Women and Children Protection Desk (WCPD), city legal kag ang eskwelahan.
Suno diri, si Jacob naga-eskwela sa Escalante National High School samtang ang hinablos naman ni Jhia naga-eskwela sa Old Poblacion National High School kag nagkilalahay sila nga duha paagi sa roblox.
Suno diri, gina-identify pa ang identity ni Jacob apang ginadeny sang hinablos ni Jhia sa pahayag sini nga deactivated na ang account.
Suno kay Florendo, wala ginsuspend ang klase apang kun kuhaon sang ginikanan ang ila mga kabataan kag papulion, wala man ini sang problema.
