Gin-isol ang closing ceremony sang Negros Island Region Athletics Association Meet 2026 bwas, Biyenes, Marso 6, 2026.
Nahibaluan nga sa orihinal nga schedule, Marso 7 kuntani ang closing ceremony sang pahampang.
Sa interview sang Bombo Radyo Bacolod kay Department of Education Negros Island Region Spokesperson Almyr Dequinia, sila ang nagpatigayon sang adjustments sa pila ka oras sang mga hampang bangod sa mataas nga Heat Index nga nagdangat sa 40 degrees Celsius.
Alas-12:00 sang udto, 40 percent na ang na-award nga gold medals.
Suno kay Dequinia, may tyansa nga makalagas ang iban nga mga delegasyon bangod madamo pa sang sarang makuha nga medalya.
Bwas may-ara pa sang mga nabilin nga sporting events, kag ginalantaw nila nga patigayunon na lamang sa hapon ang closing ceremony.
Nahibaluan nga madamo naman sang mga atleta nga nag-una na sa pagpauli sang matapos ang ila events.
Panugyan ni Dequinia sa mga sports enthusiasts kag iban pa nga mga pumuluyo nga padayun nga suportahan ang mga nabilin nga hinampang.
Aminado sini nga ang pinakadako nga challenge amo ang heat index, samtang hugot naman nga ginatindugan sang DepEd NIR nga ang ila prayoridad amo ang safety sang mga atleta.
Aminado ini nga may mga minor sports injuries kaangay sang muscle cramps, nga madasig man nga ginarespondihan sang mga medical team.
