Kapin duha ka metros ang ginsaka sang seabed sa kadagatan sang Sarangani kasunod sa nagluntad nga magnitude 7.8 nga linog nga nagresulta sa pagkapatay sang marine organisms.
Sa interview sang Bombo Radyo kay Cindy Rodrigo, Asst. Division Chief sang Conservation and Development Division of Department of Environment and Natural Resources – Negros Island Region, ginkumpirmar sang ila opsina sa Sarangani nga may coastal uplift ukon ang pagsaka sang duta sa dagat nga resulta sang linog.
Sa pagsaka sang duta, ang tubig naga-ilig sa madalom nga bahin kag nagalapad ang hunasan.
Suno diri, ang marine organisms nga apektado amo ang sea grass, seaweeds, shallow coral reef, isda, kag mga marine invertebrates nga yara sa tunga sang shallow kag deep water.
Iya ginakasubo nga napatay ang marine organisms bangod indi sila adapted nga ma-expose sa hangin kag iban indi makadali-dali saylo sa madalom nga bahin sang kadagatan.
Suno kay Rodrigo, nakadepende pa sa assessment sang geologist kun mabalik pa sa natural state ang kadagatan apang tuman kadugay ang pagsubside ukon pag-uplift sang area kun sa diin nagadangat lamang sa centimeters ang gina-adjust sini kada tuig.
Sa karun nagpahanumdom ini sa mga tawo nga likawan nga kuhaon ang marine life bangod ginadumilian ini sa idalom sang Republic Act No. 9147 ukon Wildlife Resources Conservation and Protection Act kag kun may yara man sang himoon nga research ukon collection sang wildlife, dapat may yara sang permit halin sa Bureau of Fisheries and Aquatic Resources (BFAR) kag Local Government Units.
