Handa ang chairman sang Bayan Muna nga atubangon sa isa ka debate ang commander sang 303rd Infantry Brigade (IB) Philippine Army.
Madumduman nga ginhangkat ni Brigadier General Benedict Arevalo si Bayan Muna chairman Atty. Neri Colmenares kag iban pa nga miembro sang Makabayan Bloc sa Kongreso para sa isa ka debate kun sa diin ginpahayag sini nga magaguwa ang kamatuoran.
Suno kay Colmenares, bisan ano nga oras kag bisan diin pa, handa ini nga atubangon si Arevalo.
Apang, gin-athag sini nga ang ila dapat debatehan ang legalidad sang ginpatigayon nga raid sang pulis kag militar sa mga opisina sang mga progresibo nga grupo.
Dugang pa ni Colmenares nga madugay na sila naga-word war ni Arevalo bangud kada maghatag sang pahayag ang opisyal sang Philippine Army, gilayon naman nga nagasabat ang grupo nanday Colmenares.
Nahibaluan nga ang pagpanghangkat ni Arevalo ang kasunod sang pagpadulong sang mga matag-as nga opisyal sang mga progresibo nga grupo sa Bacolod agud makita ang ila mga kaupdanan nga ginpang-kustodiya sang kapulisan matapos ang implementasyon sang apat ka mga search warrants sa mga opisina sang Gabriela Partylist, Anakpawis kag Kilusang Mayo Uno (KMU) NEgros sang Oktubre 31.
