Ginahulat pa sang Commission on Elections ang desisyon sang Korte Suprema angot sa pagpagwa sang temporary restraining order batok sa implementasyon sang Republic Act 12326 ukon ang layi nga nagatalana sang term-of-office sang Barangay kag Sangguniang Kabataan officials sa lima katuig matapos nga may nagfile sang petisyon sa pagkwestyon sini.
Nahibaluan nga si Election lawyer Romulo Macalintal ang nag-file sang petition for certiorari and prohibition sang Lunes, September 28 nga nagakwestyon sa constitutionality sang Republic Act 12326, kun sa diin ang respondents amo ang Office of the President, Senado, House of Representatives kag Commission on Elections.
Ginhingyo man sang abugado ang Korte Suprema nga indi pagpahanugutan ang pagpatuman sang layi nga nagapostpone sang November 2026 Barangay kag Sangguniang Kabataan Elections sa November 2028.
Suno kay COMELEC-NIR Director Atty. Lionel Marco Castillano nga magasunod ang COMELEC sa kun ano man ang mangin desisyon sang Korte Suprema.
Nahibaluan nga sang ginpasar ang layi ang tanan nga mga aktibidad nga may kaangtanan sa preparasyon sa BSKE 2026 ang ginpauntat.
Sa idalom sang Omnibus Election Code, sarang mapaisol sang Comelec ang election sa sulod sang 30 ka adlaw pagkatapos sang force majeur.
Gin-athag ni Castillano, magadepende ini sa gihapon sa direktiba sang Comelec En Banc.
