Apisar sang mga gin-file nga mga hagna sa pagduso nga ipaiway ang pagpatigayon sang Barangay and Sangguniang Kabataan Elections (BSKE) nagapadayon ang Commission on Elections sa ila nga preparasyon para sa November 2 elections.
Suno kay Negros Occidental Provincial Election Supervisor Atty. Ian Lee Ananoria samtang wala sang layi nga napasar para sa pag-isol sang petsa sang nasambit nga piniliay, magapadayon sila sa pagpreparar para sa Nobyembre 2 nga piniliay bangud kabahin ini sang ila mandato kag mabudlay nga indi sila preparado.
Suno kay Ananoria, magaagi sa regular nga proseso sang paghimo sang layi ang mga gin-file nga mga hagna nga nagapa-postpone sang BSKE kag diri magadepende kun mangin madasig ukon madugay ang pagpasar sini.
Ini bangud ang hagna ang maagi pa sa Senado Dugang pa sang election supervisor nga sa tion nga mareset ang petsa sang election may bag-o naman nga budget suno kay COMELEC chairman George Erwin Garcia samtang ang mga balota nga napreparar na ang sarang pa man magamit bangud manual ang pagpatigayon sang BSKE.
