COMELEC, nagapaandam batok sa social media post nga nagasukot sang P3,000 kabaylo sang voter’s registration

Nagpaandam ang Commission on Elections batok sa nagalapta nga peke nga Facebook post nga nagahambal nga may bayad nga P3,000 para sa voter registration.

Sa ila official advisory, hugot nga ginpanginwala sang Comelec ang nasambit nga impormasyon kag ginhighlight nga wala ini nagikan sa ila ahensya.

Suno diri, wala sang maskin ano nga bayad nga ginapangayo sa kun sin-o man ang luyag magparehistro bilang botante kag ang nasambit nga kinamatarong ang garantisado sang Konstitusyon.

Ginpahayag man sang Comelec nga wala sa ila official ukon verified social media accounts ang nasambit nga anunsyo.

Una na nga ginpahayag sang poll body nga magaresume ang registration para sa Barangay and Sangguniang Kabataan Elections sa Oktubre subong nga tuig.