Nagpanawagan ang Regional Director sang Commission on Election (COMELEC)- Negros Island Region sa mga kapulisan nga mangin proactive kasunod sa natabo nga pagpang-agaw sang Certificate of Candidacy sa ciudad sang Himamaylan kahapon sang aga, Oktobre 8, ulihi nga adlaw sang filing period.
Sa interview sang Bombo Radyo kay Atty. Lionel Castillano, wala sang may nagluntad nga untoward incidents sa probinsya sang Negros Oriental kag Siquijor samtang may minor incident naman nga nagluntad sa ciudad sang Himamaylan, probinsya sang Negros Occidental.
Kahapon, samtang nagalakat ang aspirant nga si Engr. Vicente Genova bitbit ang isa ka folder nga naga-unod sang iya COC, hinali lang ini nga gin-agaw sang isa ka lalaki nga naguksok sang tshirt nga itom kag naka-kalo.
May yara pa gid sang isa ka kaupod ang lalaki apang nahingagaw man agaw sang kaupod ni Genova ang folder kag amat-amat naman nalagyo ang mga lalaki.
Natigayon naman nga nakafile sang COC si Genova.
Suno kay Castillano, napablotter na ang duha ka mga persona kag gina-imbestigaran na sang kapulisan ang natabo.
Nagpanawagan naman si Castillano sa mga kapulisan nga mangin proactive sa pagbantay kasunod sa ila nga trabaho nga paghatag sang security sa vicinity sang COMELEC offices.
Dugang pa sini, ang natabo nga minor incident ang dapat nga ireport sa command center sang COMELEC bangod sa inisyal nga imbestigasyon ang insidente ang may kaangtanan sa COC filing.
