Ginahulat pa sang pamilya kag katapo sang Bacolod City Police Station 7 ang resulta sang autopsy examination sa commercial sex worker nga nasapwan nga patay sa higad sang dalan sa Purok Progreso, Barangay Alijis, ciudad sang Bacolod sang Hwebes, Setyembre 8.
Suno kay Police Capt. Elmer Bonilla, station commander sang Bacolod Police Station 7, napaidalom na sa autopsy report ang bangkay sang biktima nga si Rovily Alcantara Mahinay, 26-anyos kag residente sang Purok Riverside, Bolinao, Barangay 1.
Suno kay Bonilla, indi pa kuntani magpasugot ang pamilya sang biktima nga ipaidalom ini sa autopsy apang gin-engganyo nila ang mga ini nga ipaidalom sa autopsy ang bangkay agud matumod ang rason sang iya kamatayon.
May yara man sang babayi nga nagpadulong sa Police Station 7 nga kaupod man sang biktima nga commercial sex worker nga naghatag sang statement apang baliskad sa ginpahayag sang live-in partner sang biktima.
Suno kay Bonilla, indi pa mapasakaan sang kaso ang bugaw sang biktima bangud wala pa matumod kun may kahilabtanan ini sa iya nga kamatayon.
Ginapadulungan man sang katapo sang Police Station 7 ang lugar sang bugaw agud makahatag man sang iya pahayag sa natabo nga insidente apang indi man sang mga ini maabtan.
