Ginakasubo sang pinuno sang Committee on Peace and Order sa Sangguniang Panlungsod sa syudad sang Bacolod ang mga sunod-sunod nga krimen nga nagakatabo sa syudad.
Sa interview sang Bombo Radyo kay Councilor Al Espino, wala sini maluyagan ang nagakatabo nga pagpanghold-up in broad daylight kaangay sang natabo sa 23 anyos nga babayi sa Barangay Tangub kasubong man sang gintiro-patay nga senior citizen kag anay asset sang NBI sa atubang sang tyangge sa Barangay 32, Bacolod City sang tinalikdan nga adlaw.
Suno kay Espino, paliwat-liwat nalang nga ginapahayag nga isolated case kag nagakatabo man liwat ang krimen.
Ginpahayag man sini nga wala na sang oras nga ginapili ang mga kriminal agud nga magpangbiktima sang mga pumuluyo sang syudad.
Nagapati man ini nga yara sa maayo nga kamot ang syudad sa pagpanguna ni Bacolod City Police Office City Director Police Col. Manuel Placido.
Konsultahon man sini personal si Police Col. Placido angot sa pagresolbar sa mga nagkalatabo nga krimen sa syudad.
Suno kay Espino, nauntat naman ang financial assistance sang Philippine Amusement and Gaming Corporation (PAGCOR) sa mga police stations kasubong man sang gasolina humalin sang Marso 2020 bangud wala na ini sang operasyon.
Suno diri, ayuon sini ang alkalde agud nga mahatagan sang bulig ang mga police agud nga mas mapasanyog ang ila nga operasyon.
Ginpahayag man sini nga indi magkahuya magpalab-ot sa iya sang mga concerns bangud willing man ini nga magbulig.
Nagpanawagan man ini sa mga pumuluyo nga mangin vigilante bangud kun magasalig sa police, indi patas ang kadamuon nila sa kadamuon sang tawo sa syudad.
