Ginklaro sang Regional Director sang Land Transportation Franchising and Regulatory Board – Negros Island Region nga mga consolidated traditional jeepney ang ila unahon nga hatagan sang financial assistance.
Sa interview sang Bombo Radyo Bacolod kay LTFRB-NIR Director Atty Gerry Llena, luwas sa fuel subsidy nga ihatag sa mga driver paagi sa Assistance to Individuals in Crisis Situations (AICS) sang Department of Social Welfare and Development, ang LTFRB ang may separado man nga financial aid.
Una na sila nga nakahatag sang “significant amount” sa mga operators bangod mas mahapos ang mga ini nga mavalidate, samtang ang financial aid ang nakadepende man sa kadamuon sang jeepney units sang operator.
Aminado ini nga may kabudlayan pa sa pagtipon sang listahan sang mga drivers bangod gintinguhaan nila nga derekta nga mahatag sa drivers ang ayuda kag indi ipaagi sa operators.
Ginklaro naman ni Llena nga prayoridad nila nga una mahatagan ang mga drivers nga may valid franchise, may authority to operate, provisional authority ukon special permit.
Aminado ini nga madamo sang luyag malakip sa listahan, apang pahanumdom ni Llena nga unfair para sa mga nagsunod sa layi kun mauna pa ang mga wala nagasunod sa proseso.
