Patay ang 37 anyos nga construction worker matapos nga ginluthang sang riding in tandem suspects sa Purok Masagana, Barangay Taculing ciudad sang Bacolod, kahapon kapin alas-5:30 sang hapon.
Suno sa mga naka-witness sa natabo, nakasakay sa motorsiklo ang duha ka suspetsado nga lunsay naka-helmet kag nag-U-turn sang makita ang biktima.
Sa paglaragway sang witness, maniwang ang suspetsado nga naga-angkas nga amo ang nanaog kag nagtiro sa biktima samtang dako naman ang panglawason sang nagamaneho sang motorsiklo.
Matapos ang insidente, gilayon naman nga nagpalagyo ang mga suspek.
Samtang, ang area naman kun sa diin natabo ang shooting incident ang malapit gid lamang sa balay sang biktima kag walking distance lamang sa estasyon sang Bacolod Police Station 6.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, sa dughan ang igo sang biktima nga gintunaan sang kamatayon sini.
Indi pa mapagwa ang ngalan sang biktima bangud wala pa sang clearance nagikan sa pamilya.
Indi pa man sa karun matumod kun ano nga calibre sang armas ang gingamit.
Suno diri, padayon ang ila imbestigasyon para matumod ang mga suspetsado kag motibo sa natabo.
