Naggutok ang dalagan sang trapiko matapos nahulog sa tunga sang dalan ang isa ka container van nga nakasangit sa kable sang kuryente sa Lopez-Jaena Street, Brgy. Villamonte, ciudad sang Bacolod, kapin alas-5:00 kahapon sang hapon.
Suno sa driver sang trailer truck, wala man sang problema ang paglabay sini sa area sang siya ang nagdeliver sang food products sa isa ka establisyimento apang sang nagbalik na ini labay sa amo man nga ruta, nasangit sang container van ang manubo nga kable sang kuryente kag ini ang nahulog.
Suno diri, may yara sang mga truck nga nagalabay nga masami man nga nagakasangit sa kable sang kuryente sa amo nga area.
Gin-ako man sang drayber nga wala sini ginhugot ang lock sa container van bangod nga sa ciudad lamang ini nagdeliver kag indi man malayo ang byahe.
Dugang pa sini, kun hugot ang paglock sini sang container van, posible pa nga natumba ang mga poste sang nakasangit ini sa kable sang kuryente.
Wala naman sang may nahalitan sa natabo nga pagkahulog sang container van apang naggutok ang dalagan sang trapiko sa lugar.
Nagabug-at sang napulo ka tonelada ang container van nga wala sang unod.
