Ginpanindugan sang convenor sa Power Watch Negros nga may ara gid sang kakulangan sa bahin sang National Grid Corporation of the Philippines (NGCP) sa natabo nga fluctuation kag pagkadula sang supply sang kuryente kagab-i.
Sa interview sang Bombo Radyo Bacolod kay Wennie Sancho, makapilana nga natabo ang malawig nga brown out kag fluctuations sa kuryente bangod sa ginapatigayon nga mga preventive maintenance kag iban pa nga mga problema.
Apang pahanumdom ni Sancho nga ginarequire sa NGCP nga may-ara sang 4 percent nga spinning reserve ukon standby reserve gikan sa total power supply, agud nga magamit nga pangcover inkaso may-ara sang kakulangan sa supply sang kuryente.
Paathag sini nga duha na ka tuig nga ginapanawagan sang Department of Energy (DOE) nga magpreparar para sa ancillary service, apang wala ini nakahibalo kun ngaa tubtob sa karun wala mahimo sang NGCP.
Aminado si Sancho nga indi gid man mapreserve ang electricity bangod ini ang real time product, apang dapat may-ara sang generation plant ukon distribution utility nga may spinning reserve, nga magasalo sa kulang nga capacity.
Suno diri, isa sa rasun nga wala dayun maakomodar sang NGCP ang pagpasulod sang nagakaigo nga supply sang kuryente bangod wala pa matapos ang Cebu-Negros-Panay project.
Nagapati si Sancho, nga mapahagan-hagan ang problema sa brownout sa tion nga mahatagan na sang prangkisa ang Negros Electric and Power Corporation (NEPC).
Pinaagi sini ginalantaw nga mabayaran na sang NEPC ang distribution asset sang Central Negros Electric Cooperative (CENECO) nga magakay-o sa powerline, generator kag substation nga kinahanglan na nga ma-islan.
Ginalantaw nga suguran naman sa masunod nga semana ang pagtalakay sa hagna nga nagahatag sang prangkisa sa NEPC sa Senado, bangod ini ang nakapasar na sa 3rd and final reading sa House of Representatives.
