BACOLOD CITY-Ginaduso sang konsehal sang Bacolod nga mapasakaan sang kaso ang mga responsable sa pag-vandalize sang Bacolod City Esplanade.
Sa interview kay Councilor Ceasar Distrito, gintawag sini ang mga sa likod sang insidente nga mga “kulang sa pansin” nga wala sang iban nga himuon kundi higkuan ang proyekto nga para sa katahom sang ciudad kag mangin sa ikaayong lawas sang mga Bacolodnon.
Kasunod sini, ginaduso ni Distrito nga lagson sang mga kapulisan ang grupo nga naga-claim sa social media nga sila ang sa likod sang vandalism kag pasakaan sang kaso nga paglapas sa Anti-Vandalism ordinance sang Bacolod.
Bangud wala pa naturn-over sang Department of Public Works and Highways (DPWH) ang proyekto sa city government, luyag sang konsehal nga sila mismo ang magbantay sa lugar agud indi na masulit ang insidente.
Hunyo 18 pa sini nga tuig natalana iturn-over sang DPWH ang proyekto sa ciudad sang Bacolod.
