Patay ang incumbent councilor sang Moises Padilla, Negros Occidental kag tiyo sini nga anay punong barangay matapos gin-ambush samtang nagapangampanya kaina sang udto.
Suno sa hepe sang Moises Padilla Municipal Police Station nga si Police Captain Junjie Liba, gin-ambush ang convoy nanday Sangguniang Bayan member Michael Garcia samtang nagalabay sa Hacienda Dresden, Barangay Inolingan.
Bangud sa madamo nga igo sang bala, gilayon nga napatay ang konsehal kag ang tiyo sini nga si Mark Garcia, anay punong barangay kag presidente sang Association of Barangay Captains sa amo nga banwa.
Suno kay Liba, kaupod man sa convoy ang salakyan ni Moises Padilla Vice Mayor Ella Celestina Garcia-Yulo nga utod man ni Mark apang yara ini sa luwas nga kahimtangan.
Suno sa mga nakasaksi sa krimen, sakay sa motorsiklo kag pick-up ang mga suspetsado nga armado sang matag-as nga kalibre sang armas-luthang kag nagpalagyo padulong sa kaiping nga banwa sang Isabela.
Si Mark Garcia ang nagresign bilang punong barangay sang Barangay 1 sadtong December 2017 bangud sa health issues kag gilayon naman nga ginbaton ni Mayor Magdaleno Peña ang iya resignation.
Ang utod naman sini nga bise alkalde ang bag-o lang nakagwa sa prisuhan matapos magpiyansa sa kaso nga illegal possession of firearms and explosives matapos madakpan sa checkpoint operation sadtong December 2017, kaupod ang iya mister.
