Na-eleher bilang presidente sang Philippine Councilors League (PCL) Negros Occidental Chapter ang bag-o nga konsehal sang ciudad sang Silay kag anay media practitioner nga si Ryan Milos Romeo Gambo.
Sa eleksyon nga ginpatigayon sa isa ka hotel sa ciudad sang Bacolod kahapon, nagdaog si Gamboa sa boto nga 179 batok sa bata ni former Governor Alfredo Marañon Jr. nga si Arthur Christopher Marañon sang Sagay City nga nakakuha naman sang 148 votes.
Ginboto nga bise-presidente ang wala sang kontra nga si Julius Martin Asistio kag nakakuha sang 274 votes.
Samtang napilian nga Secretary General si Rey Cordova nga may 177 votes; Treasurer si Julie Ann Vazquez nga may 159 votes; unopposed naman ang Auditor nga si Miguel Zayco nga may 299 votes; Public Relations Officer (PRO) si Audie Malaga nga may 159 votes kag Business Manager si Virgie Pastor nga may 162 votes.
Ginkilala naman ang mga elected board members nga sanday Councilors Janet Villafranca, Armando Alvarez, Vicente Perez, Lorlan Evangelista, Rolin Meliton, Victor Javellana, Elizabeth Andrino kag Mikaela Escalante.
Sa pagdaog niya bilang bag-o nga presidente sang PCL Negros Occidental Chapter, nagalaom si Gamboa nga mag-ugyon ang tanan nga konsehal sa mga panindugan sa anuman nga kawsa kag makahatag sila sang bag-o naman sa lamesa.
Si Gamboa na ang magatiglawas sang PCL sa Sangguniang Panlalawigan.
Samtang nabaton naman ni Coucilor Marañon ang kalutusan sini kay Gamboa kag nagalaom ini nga indi man sila pagpabay-an bangud alalangay man lang sila gihapon nga mga konsehal.
