Nagpanindugan ang punong barangay sang Barangay Banago diri sa ciudad sang Bacolod nga natural lamang nga ipablotter sini ang isa ka konsehal bangud naguba ang propiedad sa barangay nga ginapanag-iyahan sang syudad agud nga may yara ini sang ipakita sa tion nga pangitaon ini sang gobyerno.
Sa interview sang Bombo Radyo Bacolod kay Punong Barangay Ricky Mijares sang Barangay Banago, Bacolod City, ginpablotter sini si City Councilor Vladimir Gonzales bangud naguba ang ginhimo nga boulevard para sa shoreline protection kun sa diin una ang barangay ang nagpatampok kag ginbuligan man sang syudad sang Bacolod.
Suno kay Mijares, ang pika-pika ang madugay na nga nagaeksister apang sang nagpungko ini bilang barangay kagawad sadto ginpatampukan ini kag sang nangin punong barangay na ini ginpahimuan niya ini sang boulevard bilang shoreline protection.Ginpataasan man ang pika-pika agud nga indi malab-ot sang hampak sang balod ang mga panimalay nga yara sa higad sang baybay.
Suno kay Mijares, manugtapos na kuntani ang boulevard kag suga nalang ang kulang apang nagpandemic gani wala ini nadayon.
Suno sa punong barangay, nagpablotter ini bangud naguba na ang boulevard kasunod sang ginpatigayon nga reclamation sang konsehal.
Wala man naklaro sa karun kun ginapanag-iyahan man gid sang konsehal ang ginreclaim nga duta.
Suno kay Mijares, wala man ini sang problema sa ginapahimo nga proyekto sang konsehal apang dapat nag-agi lamang sa husto nga proseso.
