Magasumiter sang resolusyon si Bacolod City Councilor Wilson “Jun” Gamboa Jr. nga magahatag sang gahom sa Bacolod City Government agud sila ang may pangamot kag maka-intervene sa mga operasyon sang water distribution utility.
Sa interview sang Bombo Radyo Bacolod kay Gamboa, nga nagaserbe convernor sang Water Watch Negros, dapat nga makatuon sa ginhimo sang Del Monte, Bulacan, kun sa diin ginbawi sang ila lokal nga panggobyerno ang kontrol sa water distribution utility kag ginterminate ang public-private partnership sa Primewater.
Ang banwa sang Del Monte man ang nagpili sang ila kuhaon nga bag-o nga water concesionaire.
Ini bangod nakita ni Gamboa nga kaangay nga yara na lamang sa kamot sang pribado nga negosyante ang sitwasyon sang tubig sa ciudad sang Bacolod.
Dugang pa sini nga private interest lamang ang ginatipigan sang negosyo, kag wala sang pag-ulikid sa mga water consumers.
Plano ni Gamboa nga mapasar sa first reading sa masunod nga Miyerkules ang iya iduso nga ordinansa.
Suno diri, ang mga dalagko nga tikang sang BACIWA-Primewater ang dapat maglabay man sa City Council.
Dugang pa ni Gamboa nga dapat magsukot man ang City Government sang royalty, bangod ang tubig nga ginagamit ang gikan man sa mga water sources sang ciudad.
Suno diri, ginpabay-an lamang sadto ang BACIWA-Primewater apisar nga tatlo ka tuig nga wala sang naggawad sang business permit, kag bisan ang bayad ang kwestyonable pa.
Apang paathag ni Gamboa nga wala ini nagabalabag sa JVA, sa baylo gusto lamang sang matuod-tuod nga partnership nga indi lamang ang pribado nga kompanya ang nagadesisyon sang tanan.
