Ginkompirmar sang Provincial Administrator sang Negros Occidental nga may yara sang nagdugang nga duha ka mga kaso sang COVID-19 sa probinsya.
Sa interview sang Bombo Radyo kay Atty. Rayfrando Diaz, ginpahayag sini nga si Patient No. 3 kag Patient No. 4 ang lunsay mga Overseas Filipino Workers (OFW) nga ginrepatriate kag nag-abot sa probinsya sang Abril 14.
Si Patient No. 3 ang isa ka 38-anyos nga lalaki nga residente sa Silay City kag nagikan sa The Netherlands.
Samtang si Patient No. 4 naman ang isa ka 50-anyos nga lalaki nga taga-Candoni kag nagikan sa Finland.
Suno kay Diaz, pag-abot sang mga OFWs sa probinsya, gilayon sila nga gindala sa quarantine facility sa EB Magalona kag ginkuhaan sang swab testing.
Suno sa iya, nag-abot ang resulta kagab-i kag nagpositibo ang duha apang asymptomatic ang mga ini kag wala man nagalain ang pamatyag.
Sa karun, naka-quarantine ang mga ini sa Provincial Healing Center sa EB Magalona kag ginapaidalom sa strict isolation.
Nagpasalig man ang provincial administrator nga magapadayon ang ila pagbulig sa pagpapauli sang mga OFWs sa probinsya bangud mabudlay man ang ila sitwasyon.
Nagpahanumdom man ini sa mga pumuluyo nga maghalong gid bangud masami nga ang mga nagapositibo ang asymptomatic.
