Nangin madinalag-on ang ginpatigayon sang Bacolod COVID Vaccination Council (COVAC) nga simulation exercise angot sa paghatag sang Covid vaccine sa tion nga available na ini nga ginpatigayon sa gym sang Barangay Villamonte syudad sang Bacolod kahapon sang hapon.
Sa interview sang Bombo Radyo kay Dr. Edwin Miraflor, officer-in-charge sang Bacolod City Health Office, ginpatpat sini ang proses kun ang isa ka tawo ang magpavaccine: una manghugas sang kamot, mapa-preregister kag tublukan sang vaccine pagkatapos dal-on sa monitoring area.
Suno kay Miraflor, kinahanglan nga icheck kada 15 mins ang natublukan sang vaccine kag kinahanglan nga magtinir sa vaccination area sang isa ka oras bangud wala pa nahibaluan ang mangin side effect sang vaccine.
Sa tion nga wala man sang side effects nga mabatyagan ang nabakunahan, mahimo na ini nga magpauli.
May nakatambay naman nga mga doctor sa vaccination area kasubong man sang ambulansya agud madala sa government hospital ukon mahimo man private hospital ang nagakinahanglan nga dal-on nga mga ginbakunahan.
Ginpahayag man sini nga ang mahimo lang nga maghatag sang bakuna amo ang authorized barangay health workers, mga nurses, 4th year nursing students, midwives, 4th year midwifery students kag mahimo man ang mga doctor.
May yara naman sang 50 ka mga participants ang nakigbahin sa ginpatigayon nga dry run sang vaccine kahapon.
Ginpahayag man sini nga may yara sang 26 ka mga natumod nga mangin vaccination centers nga nakapasar sa guidelines nga ginhatag sang Department of Health kaangay sang open nga area kag malapad.
