CPP-NPA-NDF, ginaduso nga madeklarar nga “persona non grata” sa banwa sang Toboso

Ginarekomendar sang Peace and Order Council sang banwa sang Toboso nga ideklarar nga persona non grata ang Communist Party of the Philippines – New People’s Army – National Democratic Front (CPP-NPA-NDF) sa nasambit nga banwa.

Nahibaluan nga nagpatigayon sang peacefull rally kahapon ang grupo sang Buklod Kapayapaan sa Toboso public plaza nga nagapanawagan sang kalinong kag katawhayan sang mga pumluyo sa banwa.

Sa press conference kahapon, ginpahayag ni Toboso Municipal Public Information Officer Albertito Morados, nga majority sa council ang nag-ugyon sa pagdeklarar sang persona non grata ang mga grupo sang rebelde kasunod sa natabo nga engkwentro sa barangay Salamanca nga nagresulta sa pagkamatay sang 19 ka mga gina-alegar miyembro sang NPA.

Suno kay Morados, sa iya nahibaluan, wala sang bisan isa ka estudyante nga nagkadto ukon nagpahibalo nga may patigayunon nag research sa lugar.

Paathag sini nga kun ang mga ginapahayag nga nalakip sa napatay ang mga estudyante, researchers kag community journalist dapat sila ang may letter nga nagikan sa ila unibersidad.

Dugang pa, bangud may ara sang menor de edad nga nalakip man sa 19 ka napatay sa engkwentro dapat ini ang may parent’s consent ukon may dokumento nga ginpakita nga mapresentar sa Local Government Unit agud nga masiguro ang legitemacy process.

Suno diri, ang pagpasa sang resolution nga ideklarar nga persona non grata ang mga makawala nga grupo sa lugar ang ginakabig isa sa solusyon agud malikawan ang kaangay nga insidente.