Ginpangunahan sang regional director sang Police Regional Office 6 (PRO6) ang culmination and awarding ceremony sang mga kapulisan sa Bacolod City Police Office (BCPO) grounds matapos ang madinalag-on nga pagpatuman sang seguridad sa ginpatigayon nga 43rd MassKara Festival.
Sa interview sang Bombo Radyo Bacolod kay Police Brigadier General Leo Francisco, ang paghatag sang award ang pagpasalamat sa mga kapulisan matapos nga nangin madinalag-on ang pagpatuman sang security measures sa ginpatigayon nga Masskara Festival subong nga tuig.
Suno diri, wala sang narekord ang mga kapulisan nga dalagko nga mga insidente samtang ginapatigayon ang nasambit nga festival sa sulod sang kapin isa ka bulan.
Ginpanginbulahan sini ang mga kapulisan kag ginpasalamatan sa ila nga pagpaninguha nga mapabilin ang kalinong kag katawhay sa syudad sang Bacolod.
Ginpasalamatan man sini ang iban nga law enforcement agencies nga ginalakipan sang Philippine Army (PA), Philippine Coast Guard (PCG); Bureau of Fire Protection (BFP), Bureau of Jail Management and Penology (BJMP), National Bureau of Investigation (NBI), Philippine Drug Enforcement Agent (PDEA) kag iban pa nga mga force multipliers nga nagbulig man sa pagpasiguro sang seguridad sa syudad sang Bacolod samtang ginapatigayon ang Masskara Festival.
Suno kay Francisco, nagdangat sa 1500 ka mga kapulisan ang ginpadala sang PRO-6 para sa augmentation.
Ginkalipay man sang regional director ang pag-ugyon sang mga pumuluyo sa syudad sang Bacolod kag probinsya sang Negros Occidental sa pagpabilin sang kalinong kag katawhay sa syudad.
Hatagan naman sang apat ka adlaw ang mga kapulisan agud nga makapahuway antes naman liwat nga ideploy sa October 31 tubtob November 2 para sa selebrasyon sang All Souls kag All Saints Day.
Suno kay Francisco, scheduled lamang ang pag-obserbar sang rest days sang mga kapulisan agud indi man maapektuhan ang ila nga police operations.
