Kadungan sang pag-restrict sa mga pangayaw nga maggwa-sulod sa Bacolod kadungan sang general community quarantine, may curfew man nga ipatuman sa ciudad epektibo subong nga tuig.
Sa idalom sang Executive Order No. 22 Series of 2020 nga ginpagwa ni Mayor Evelio Leonardia subong nga Martes, ang curfew hours magasugod alas-10:00 sa gabi-i kag magatakop alas-4:00 sang kaagahon pagkasunod nga adlaw.
Ginamanduan sini ang mga ginikanan nga mangin responsable sa ila mga kabataan nga indi sila maglapas sa curfew.
Ang sin-o man nga maglapas sa curfew suno sa EO ang dakpon sang PNP.
Exempted lamang sa curfew ang medical personnel kag mga persona nga nagakinahanglan sang emergency medical help; night shift workers sa mga pharmacy kag drugstores; security guards; BPO workers; public utility emergency personnel; firefighters kag iban nga disaster relief personnel; mga pari kag ministro nga nagaperform sang last sacraments ukon last rites; kag public utility vehicle drivers nga nagaserbisyo sa una.
Kadungan sini, gina-engganyo ang mga residente sang Bacolod nga magpabilin sa sulod sang balay kun indi man lang magreport sa trabaho, magbakal sang kinahanglanon ukon magbakal sang bulong.
Ginaapela man sini ang pag-obserbar sang social distancing.
Ang mga malls, recreational centers kag community centers ang ginamanduan man nga magsirado na alas-8:00 sa gab-i, magluwas lamang sa business process outsoursing, medical centers, hospitals, iban pa nga health care establishment, pharmarcies kag funeral parlors.
