Ginhimuan man sang Bacolod Traffic Authority Office sang solusyon ang tuman kagutok nga dalagan sang trapiko sa Dalan Araneta bangud sa road repair.
Sa interview sang Bombo Radyo kay Police Major Junji Liba, nakig-angot na kuntani ini sa contractor sang road repair sa Araneta Street apang indi macontact ang iya nga numero.
Bangud sini, ang tanan nga delivery trucks nga nagikan sa BREDCO Port padulong sa southern Negros ang ginapaliko sa San Juan Street padulong sa circumferential road libot sa Barangay Bata kag magwa sa CEGASCO sa Barangay Pahanocoy.
Suno kay Liba, dako ang danger sang dalagko nga trucks sa mga estudyante kun nagalabay sila sa San Juan-Rosario padulong sa Araneta bangud malabayan nila ang ETCS, Rizal Elementary School kag Negros Occidental High School.
Suno kay Liba, nagpasa na ini sang rekomendasyon sa Sangguniang Panlungsod nga mahimo nalang sang ordinansa nga mangin permanente na ang ruta nga labayan sang delivery trucks agud indi magtuga sang danger sa tatlo ka dalagko nga mga eskwelahan.
Ang nagikan naman sa taytay sa Singcang Airport, ginadivert ang mga salakyan nga padulong sa downtown ang ginadivert sa Roxas Avenue kag naggwa sa Lizares ukon Lacson Street.
Wala ginhimutig ni Liba nga nagdamo pa gid ang mga salakyan bangud sa modernized jeepneys apang nagalapta man ang mga ini sa nagkalain-lain nga ruta.
