60 porsyento nga positibo ang chairman sang Commitee on Markets and Slaughterhouse sa Sangguniang Panlungsod nga ma-extend ang deadline sang mga tenants sa Manokan Country agud nga makabayad sang ila utang sa Bacolod City Government.
Madumduman nga ginhatagan na lamang sang city government sang tubtob sa Setyembre 30 ang mga tenants sa Manokan Country agud mabayaran ang ila mga arrears.
Sa interview sang Bombo Radyo kay Councilor Councilor Celia Flor, sa iya assessment, 60 porsyento ini nga positibo nga ma-extend ang deadline bangud sa 28 ka mga stall owners, duha lamang ang wala sang development kag magluwas sa tatlo nga updated nga nagabayad sa ciudad, may tatlo nga nagbayad sang dalagko nga kantidad para sa ila arrears.
Suno kay Flor, sa sulod lamang sang tatlo ka semana, nakakolekta ang ciudad sang kapin P900,000.
Ginpakita ini sang konsehal kay Mayor Alfredo Benitez kag ginakalipay man ini sang alkalde.
Kahapon, liwat nga nakighinun-anon si Flor kaupod ang mag stall owners kag nagpromisa ang mga ini nga madugang-dugangan ang ila pagbayad sang ila mga arrears tubtob sa Setyembre 30.
Suno sa iya, daw may yara sang positibo nga response ang alkalde nga iga-extend sini ang deadline apang pagalantawon pa sa masunodnga semana kun makit-an sang ciudad ang effort sang mga tenants nga madugang-dugangan ang collection.
Sa karun ginaathag sini nga nagapabilin sa Setyembre 30 ang deadline sang mga stall owners apang pagatinguhaan sini nga ma-extend kun makit-an ang ila repayment rate.
Kun wala naman sang improvement suno diri, masira gid ang ila mga negosyo bangud madamo sang naga-offer nga makapwesto sa Manokan Country nga handa magbayad sa ila mga arrears.
Nagapanindugan man ang konsehal nga indi ini magpasugot sa ideya sang privatization bangud ang Manokan Country ang landmark kag makabig na nga heritage sang ciudad gani indi ini dapat pag-ibaligya.
