Patay ang isa ka delivery rider matapos nga nabungguan sang Ceres bus ang iya nga motorsiklo sa national highway sa Sitio Buhian, Barangay To-oy, ciudad sang Himamaylan, Negros Occidental, alas-3:50 ang takna kahapon sang hapon, Hunyo 30.
Ginkilala ang biktima kay Hernan Panaligan, 41-anyos, kasado kag residente sang Barangay III Poblacion, Himamaylan City samtang ang driver sang Ceres bus ang ginkilala kay Julian Jenon, 48-anyos, kasado kag residente naman sang Sitio Mombay, Barangay Talacdan, Cauayan, Negros Occidental.
Sa interview sang Bombo Radyo Bacolod kay Police Lt. Col. Anthony Grande, chief of police sang Himamaylan City Police Station, ang Ceres Bus nga may plate number nga FWU 290 ang nagabiyahe sa National Highway padulong sa Bacolod City sang aksidente nga nabungguan ang Kawasaki Barako 175 CC nga ginamaneho sang biktima nga nagabiyahe sa opposite direction kag hinali lamang nga nagliko kun sa diin ginkaon sini ang lane sang Ceres bus.
Gintinguhaan pa kuntani sang driver sang bus nga likawan ang motorsiklo apang nalab-ot niya gid ini.
Ang biktima ang nakaagom sang patal nga samad sa ulo kag paa. Siya ang dead on arrival sa Gov. Valeriano M Gatuslao Memorial Hospital.
Wala naman sang nasamaran sa pasahero sang Ceres bus.
Yara sa karun sa Himamaylan City Police Station si Jenon kag nagapadayon pa ang imbestigasyon sang mga kapulisan sa nagluntad nga aksidente.
Nakadepende na sa pamilya sang biktima kun magapasaka sang kaso batok sa driver sang bus.
Natalana nga mag-istoryahanay ang pamilya sang biktima kag ang management sang Ceres bus.
Suno kay Jade Marquez, media relations officer sang Vallacar Transit Incorporated, makadto ang pamilya sang biktima sa ila opisina subong nga adlaw kag magaestoryahanay pa sila.
Suno kay Marquez, ginpahayag nga ang ceres bus ang nagikan sa Candoni padulong sa ciudad sang Bacolod apang pag-abot sa lugar nga ginluntaran sang aksidente, ang motorsiklo nga ginamaneho sang biktima kag nagabiyahe sa opposite direction ang hinali lamang nagliko kag gin-agaw ang lane sang bus gani nabungguan ini.
Naestorya man sini ang branch manager angot sa aksidente kag natalana nga tsekyaron pa nila ang CCTV footage agud makita kun paano nagluntad ang aksidente bangud sa karun nakaimpound pa ang bus unit.
