Patigayunon na ang demolition sa mga balay sa Barangay 2, Bacolod City nga nahamtang sa suba subong nga Enero.
Sa interview sang Bombo Radyo kay Bacolod City Legal Officer Atty Karol Chiu, sang tinalikdan nga tuig, ginhatagan na sang palugit ang mga pumuluyo sa nasambit nga lugar bangod sa ayo nga indi anay sila i-demolish bangud sa selebrasyon sang paskwa kag bag-ong tuig.
Suno kay Chiu, wala naman sang mga nagapamalabag nga pumuluyo sa plano nga demolition, kag sa Enero 15 na ang ila final notice.
Dugang pa sini nga 27 ka mga pamilya ang nahatagan sang rellocation sa Barangay Vista Alegre samtang duha naman ang na-disqualify.
Nahibaluan nga kabahin ini sa programa nga anti-baha bangud pila ka mga pumuluyo sa ciudad ang natukiban nga nagatukod sang mga balay sa tunga ukon sa kilid sang mga suba nga nagaresulta sa pagclog sang tubig nga makahatag sang dako nga risgo sa mga pumuluyo.
