Nagsaka sang 60 porsyento ang kaso sang dengue sa palibot sang Negros Occidental sini nga tuig.
Suno kay Provincial Health Officer Dr. Ernell Tumimbang, may yara na karun sang 5,990 ka dengue cases sa Negros Occidental humalin sang Enero 1 tubtob Agosto 10 ukon morbidity week 32.
Mas mataas ini sang 60% gikan sa 3,741 sa pareho nga period sang 2018.
May pinakamadamo nga kaso nga narekord amo ang Kabankalan City nga nagadangat sa 55 kada semana.
Nagapanguna ang Kabankalan sa napulo ka mga lugar sa probinsiya nga may pinakadamo nga dengue cases.
Nalakip man sa top 10 ang Bago; San Carlos; Cauyan; Himamaylan; Murcia; Silay; Sagay; Cadiz kag Talisay.
Yara naman sa 37 ang patay bangud sang dengue kag nagapanguna diri ang Cadiz nga may apat.
Sa gihapon nagapahanumdom si Dr. Tumimbang sa pagpanglimpyo gid sang palibot agud matapna ang pagdamo sang lamok nga may dala nga dengue virus.
